هذه محاولة لوضع بعض الأرشادات الهامة لقواعد الحوار في رووم ايجيبت ليبرالز- مصر الليبرالية للعقول الحرة و القلوب المتفتحة في ضوء تجربتنا الليبرالية للحوار و المراجعة المستمرة سواء بالحذف او الاضافة علي حسب الاحتياج.
يقوم الحاضريين بلتفاعل حول المواضيع المطروحة للحوار سواء بالطرح او التعقيب مع اتباع المعايير الأتية:
1- الألتزام بالموضوعية في المداخلات و التوضيح بين ما هو رأي يحتمل الصواب و الخطاء و بين الحقائق العلمية و التاريخية المثبتة.
2- عدم طرح او مناقشة لأفكار تدعو الي العنف، الكراهية، التكفير، الطائفية،
3-عدم التمييز علي اساس عرقي او ديني او مذهبي او اجتماعي او سياسي.
4-عدم استخدام الفاظ خارجة او تحقيرية سواء كلاما او كتابة
5-عدم الشخصنة و التجريح و التشهير بصفة عامة.
6-القيام بمداخلة و عدم الانتظار لمناقشة ردود الحاضريين.
7-تعليقات التكست التي لا تتفق مع الموضوع الذي يناقش علي المايك
الظاهر اني محتاجه حافز علشان اكتب. انا من يوم 25 يناير دموعي مجفيتش، مره من العنف والذل اللي بشوفه كل يوم، ومره من اليأس ومره من ذكريات زفت عن وطن كنت غريبه فيه طول عمري، واخيرا من الفرحه، ثم من القلق والخوف.
انا مصريه تيبيكل يعني اتعلمت في مدارس الحكومه وجامعات الحكومه واتفرجت علي تليفزيون الحكومه وقريت جرايد الحكومه ولعنت سلسفيل ابو دي حكومه. اتمرمت في المواصلات وعمري ما حسيت بآدميتي في البلد دي. قاسيت مع جيلي والاجيال السابقه واللاحقه كمان. لا اتعلمنا ولا اتثقفنا ولا اتعالجنا. العلاج المجاني وعلي نفقه الدوله ومن فلوس الغلابه الغلابه مكانوش بيطولوا ضفره والفنانين ولاعبي الكره اللي معاهم فلوس هم اللي كانوا مستفيدين. ذل وفساد وقرف. هاقول ايه وللا ايه بس ما كلنا عيشنا نفس الظروف المهينه.
لما اتخرجنا بعد ما اهالينا طلع عينهم في تربيتنا وجه دورنا نشيل ملقيناش شغل. طب نسكن يا عالم في منطقه فيها مياه نضيفه ده احنا هبه النيل يا كفره، طب صرف صحي، طب حد يشيل الزباله، بلاااااش الظاهر اننا بنبالغ في مطالبنا يا ناس، طب ممكن بس (علي استحياء) يكون فيه تأمين صحي في مستشفيات بلاش الاسطبلات دي. كتييير علينا برضو؟؟؟؟
طب نقول رأينا؟ نتكتم؟ حاضر. طب ما نموت احسن، انتوا قرفانين مننا كده ليه؟ بلاش نريحكوا من قرفنا يا سيدي.
قد ايه احساس الذل والمهانه في وطن لفظك، تستني فيه ليه بقي؟ وللا مستمرئ الذل؟
والله وانا ماشيه منها تفيت عليها م الطياره وقلت ابقي بنت…….. لو خطيت فيكي تاني يا بلد راقصات ومطبلاتيه.
هل كنت غلطانه؟ يمكن اه ويمكن لأ. بس حد جرب الاكتئاب؟ هههه ايه السؤال ده؟ متهئ لي كل مصري جربه. لما بتكون مكتئب بتذهد في كل حاجه حبيتها في يوم من الايام، وبتفرط بسهوله حتي في حياتك نفسها. ده مرض عضااااال.
ارجع تاني لجيلي، بصراحه مكانش يبشر بأي خير، شباب تافه، عاطل، جاهل يحمل بكالريوس او ليسانس واحيانا دكتوراه. شباب عجوز يائس مكبوت.
انا كنت بسمع حكايات بالنسبه لي كانت اساطير، الوحده الوطنيه وشهامه ولاد البلد، وبساله الشعب المصري، ونضافه الشوارع، وتحضر الشعب، والستات اللي بيلبسوا ميني جيب في قلب الصعيد المصري (عندي صور) ومفيش تحرشات ولا معاكسات كانت بتحصل والمدارس كانت بتعلم بجد، لأ وايه في المدارس الحكومي مدرس الانجليزي من انجلترا ومدرس الفرنساوي نايف سبيكر.
والمرتب كان بيكفي الايجار والتعليم والاكل والشرب ومصيف عشره ايام في السنه (كل سنه)
والناس كانت بتبعت لبعضها كروت معايده في الاعياد.
كل ده عمري ما شفته، طب راح فين وراح لييييييييه.
25 يناير غير جوايا وجوا غيري حاجات كتييييييير
لأول مره احس بطعم الحريه والكرامه والوطن
لأول مره اشوف الوحده الوطنيه بجد مش في فيلم بين القصرين
لأول مره اشوف اللي لابسه نقاب وخمار وحجاب واللي بشعرها مع بعض بيعملوا نفس الحاجه
والشبااااااااب اه من الشباب زمايلي واصحابي غيروا التاريخ بصوتهم وبس
الناس تصرخ بتتكلم بتواجه الجبروت بالصوت، الشعب المصري الجباااار قام بعد نوم طوييييييييييل
ندمانه اني مش هناك دلوقتي وببكي وطن سلب مني طول عمري اغتصب واتكسر واتقتل جوايا من بدري
ببكي حظي وببكي فرحا ان وطني رجع لي.
بس خايفه، خايفه فرحتي دي تغتصب تاني ويتهد الحلم ويتكسر تاني، ايه اللي جاي يا مصر!!!
هارجع لحضنك وللا هاتلفظيني تاني!!!!!!